洪卓立
十格不死的最愛
詳細資料
【不死傳奇之最鍾意嘅Games】
其實我中學嘅時間就發現自己好鍾意打機。當時候係啱啱興起網吧呢樣嘢,咁就鍾意去網吧到玩槍game啦,Rainbow Six啦,嗰陣時仲係雪地場景嘅年代。我最鍾意同班friend一齊放學走去玩一個鐘,跟住先至返屋企。一路一路演變到而家其實咩game都玩,最緊要嗰樣嘢呢,就係會同一班朋友一齊玩,一齊開咪,一路打機一路傾計,一路吹水一路鬧人啊,或者一路去指責對方啊,呢啲時間其實係好過癮,亦都好開心嘅。咁呢一排,當然講緊公餘時間,都係玩緊一路有玩嘅「LOL」,「英雄聯盟」,跟住亦都有玩「Overwatch」,最緊要嗰樣嘢都係同朋友一齊玩啦。我覺得所有嘅遊戲只要同朋友一齊玩呢,個樂趣就會倍增。而Overwatch呢隻5打5嘅槍game,要講默契啦,要講你自己嘅技術啦,要講一啲策略啦,好需要大量嘅溝通,咁而喺大量嘅溝通中間都會夾雜住好多唔可以出街嘅說話嘅,哈哈,亦都夾雜住好多鬧人嘅說話。但係打完機之後,大家就無事㗎喇,呢一個亦都係打機其中一個好玩嘅地方。

【小心同床人】
呢件事係另一個artist話俾我聽嘅(我當然唔開名啦)。佢有一個親戚,女人嚟嘅,去內地做嘢,瞓酒店。咁就訓教啦,張床隻腳嗰個位就對住一張梳妝枱,有塊鏡,而塊鏡上面就有盞燈,盞燈係好舊式、有條鐵鍊向下拉「剔咔」咁就會開燈,再「剔咔」就會閂燈。咁瞓瞓吓覺呢,就聽到「剔咔」,盞燈開咗。佢覺得好驚啦,因為無可能有任何情況個盞燈會拉到落嚟,重㗎嘛,你都要大力咁樣拉個條鐵鍊先會著燈。咁「剔咔」盞燈就開咗,佢覺得好驚,但係又唔夠膽望、唔夠膽起身,就張張被冚住自己個頭,跟住繼續訓啦。過咗陣,「剔咔」,盞燈熄咗。咁佢又係好驚好驚,諗嚟諗去都唔知點解會咁樣,正當佢諗緊點做嘅時候呢,「剔咔…剔咔…剔咔…剔咔…剔咔…」,盞燈係咁開係咁熄。咁都無辦法啦,即係其實話俾你聽「喂,有人喺度啊。」或者有啲嘢要你望,或者點樣,因為你無可能繼續落去,你都瞓唔到覺,咁佢就惟有鼓起勇氣拎開張被,一望過去嗰塊鏡。一望過去塊鏡呢,佢就見到喺塊鏡入面有個女人,指住咗自己張床,好似某一套日本電影咁樣。咁佢就好驚啦,因為佢再望一望隔離無呢個人㗎嘛,但塊鏡入面有呢個人喎,好驚,跑落去reception……

跟往鬧:「喂,你間酒店有鬼……指住咗張床……好驚啊喺塊鏡入面啊……」
Reception姐姐就好淡定,問佢:「係咪著住我哋酒店制服㗎?」
佢話:「係啊,咪著住你件衫咁樣㗎囉。」
Reception姐姐:「係咪……樣?」
佢話:「係啊,係啊,你點知㗎?」

咁擾攘咗好耐,佢要求reception姐姐陪佢上去執嘢換房。但係reception姐姐就死都唔肯喎,搞到好大件事,就報咗公安,跟住公安嚟到或者點樣,陪佢上去攞返自己啲嘢啦。一開門,就聞到成間房都係好大陣臭味,公安就問佢:「點解你頭先入去住嘅時候,無咁樣聞到嘅?」,咁佢覺得好奇怪,係喎,我真係聞到喎,頭先聞唔到,但你哋一嚟到就聞到。咁就搞咗好耐、執咗好耐嘢,諗嚟諗去覺得唔對路啦,跟住就諗起鏡入面個女仔係指住嗰張床嘅,到最尾就揭開咗床嚟睇,就發現有條屍喺入面,而條屍係著住嗰間酒店制服嘅衫。咁再問返reception姐姐點解佢會知,後尾就原來話佢哋有個員工呢,就俾人哋殺咗,唔見咗條屍,好耐㗎啦,間唔時都有租客就投訴話見到有個咁樣嘅人,喺同一間房成日都出現。

【車上的不速之客】
我一個中港車司機朋友話我知嘅,我間唔時都會坐佢車,傾開計佢就話我聽。其實前排就發生咗件事,就係呢,佢同朋友喺內地揸返架車返嚟香港嘅時間呢,過關循例就俾回鄉卡公安,check一check跟住就走。佢哋就有一個規則嘅,就係過關嘅時候要同嗰個公安講我架車有幾多個人,俾張回鄉卡佢哋,跟住就check回鄉卡。咁照樣兩個人過關啦,俾張回鄉卡公安。

公安問我個friend:「你架車有幾多個人啊?」
我個friend:「我架車有兩個人。」
公安:「唔係喎,你架車有三個人喎,後尾個女仔呢?佢張回鄉卡呢?」,我個friend:「阿sir,唔好玩啦,我哋得兩個男人喺度咋喎。」

公安就好似好尷尷尬尬,或者望吓望吓、閃閃縮縮咁樣俾返張回鄉卡我個friend,跟住叫我個friend走。佢就覺得好奇怪,會唔會係個阿sir眼花或者點樣啦,然之後,坐喺佢隔離嘅朋友就同佢講:「喂,如果你聽日無咩事可能都拜吓神啦,或者洗吓車啊點樣啦。」我嗰個司機朋友就無乜所謂,第二日又放假就洗吓啦。咁洗洗吓車嘅時候呢,佢就發現咗車頂就有兩個手掌印,咁佢就覺得好奇怪,諗吓諗吓唔對路喎,再打俾佢噚日嗰個朋友。嗰個朋友同佢講,其實呢,噚日過關嘅時候,佢就真係見到個女仔嘅。不過個女仔就唔係坐喺後面,而係喺車頂到,反轉咗個人、趴住咗落塊玻璃到,望住咗你。

【我的酒店靈異實錄】
大家聽住(陰陽路)呢隻歌或者個題目係不死乜乜乜咁樣,其實我覺得點都要噏番一兩個鬼故嘅……唔係鬼故,係事情啊。曾經都有見過一啲唔知點解釋嘅畫面,咁可能係見到有啲綠色嘅嘢殊一聲入咗道牆,好細個嘅時候嚟嘅,跟住譬如係見到有一啲腳穿過咗lift等等,你可以有好多解釋嘅,即係可能係眼花啊或者點樣啊。但我有一次去做嘢,返房休息嘅時候呢,就發生咗件解釋唔到嘅事。咁我就睇電視啦,睇完電視就沖涼,我先用遙控熄咗部電視機,就將個遙控對住咗道牆,以妨佢唔知點解無啦啦開咗部電視,嚇親我自己。咁我去沖涼啦,沖涼嘅時候我已經周身唔自在,我就唸下經啊,等自己安心啲。唸唸下經嘅時候,我突然聽到出面部電視機開咗,咁我覺得好奇怪啦,會諗可能真係唔知點樣啲嘢反射,所以就開咗部電視機,咁我都無理嘅,照沖涼,照唸經。唸唸吓經突然之間出面就「啪」一聲,我就開始好驚啦,我諗咗好耐又唔敢出去,究竟係咩事又「啪」一聲呢?我就「炸炸林」換衫啦,著好件衫出返去,咁我見到啲咩呢?我見到部電視機開咗,同埋個遙控跌咗落地下,本來係喺一張茶机上面,面向住射住咗道牆,而家就跌咗落地下。咁我後尾諗返都幾好彩嘅,就係可能啲「朋友」唔係好鍾意我喺度啦,後尾我因為呢件事就轉咗房。諗返佢用呢個方法去叫我走,而唔係走出嚟去叫我走嘅話,都係算好彩㗎啦,如果唔係我會更加驚。

【北海道札幌拉麵店「一粒庵」】
不死最愛之美食篇。其實去旅行咁多次,最開心都係去日本,因為我自己好鐘意去食嘢啦,而日本嘅嘢食又咁啱都好啱胃口,同埋仲有一個原因嘅,就係其實要睇吓你同邊一個人去,因為有時我覺得除咗碗嘢真係好唔好食之外呢,環境或者你嘅伴侶,或者同你同枱嘅人都好影響你嘅記憶。咁而家諗返最開心、最想再去多次嘅就係:北海道札幌嘅拉麵店「一粒庵」(Sapporo Ichiryuan),有興趣嘅朋友就自己搵一搵啦!我大約講講,就係喺札幌地鐵站一出左邊方向,然之後過幾條街,就會見到個牌寫住「一粒庵」,但佢就有少少難搵嘅,要落去地牢嗰度一個商場入面,但你應該會見到好多人排隊㗎啦。間嘢限定晏晝只可以賣唔知幾多碗,賣完即止㗎啦。當然你話有好多拉麵店都係好好食嘅,但係嗰一次就最深刻囉,因為同我嘅伴侶一齊去啦,咁又幾開心啦,嗰碗麵又係即刻煮㗎,香港有好多都係沖粉或者個湯底唔係熬,總之就好食啦。你有興趣就搵吓啦!

【不死最愛之想去邊度住?】
除咗香港是我家之外呢,台灣都係一個幾想逗留嘅地方嚟,因為之前有一段日子,其實就係大病之前,講緊係零九或者零八年,總之就係去台灣拍電視劇stay咗三個月。咁當初都好驚嘅,因為人手又唔夠,又無助手同我一齊去,咁我就淨係自己一個人stay喺嗰邊啦,又唔知大家溝唔溝通到。好彩我遇到一班好好人嘅crew,無論係導演又好,編劇又好,所有人都好好人。

嗰段日子雖然辛苦嘅,因為可能我做完台灣嘅工作,我仲要飛返嚟香港做香港嘅工作,跟住又即刻飛返去台灣,又拍通頂或者點樣,其實係辛苦嘅,但係嗰段日子係好開心㗎。佢哋會犧牲自己放假嘅時間去帶我出去玩,唔只一次,有好多好多次,甚至乎好多個禮拜都係咁樣做,即係陪我去玩啊,或者帶我去食嘢,去到而家咁多年之後嗰班朋友都仲有聯絡緊,佢哋去香港或者我去台灣,我都會搵佢哋。所以,我覺得嗰邊嘅人情味係好好,因為佢哋唔洗咁樣做㗎,你可能會話:「佢哋見你係artist或者同一劇組,咪咁樣做囉。」,咁但其實唔係㗎,佢無必要去咁做或者用咁多時間喺我身上。

佢地嘅人情味好濃郁,而個環境我都幾鐘意嘅,咁當然始終都會住番香港啦,如果有得揀啦,好理想化地講就係都會想喺嗰邊住吓,當係其中一個旅行渡假嘅地方囉。

【最愛日本食食食】
其實最鍾意我諗,即係我自己嚟講,其實最鍾意係日本嘅。其實好少去旅行㗎,入行之前好少,因為屋企人又唔鍾意去旅行,又唔鍾意搭飛機。我係入咗行先至因為工作關係去多咗好多唔同嘅哋方啦。咁我記得第一隻碟,《愛無膽》就係去日本一個叫金澤嘅哋方去影cover啊,或者拍mv 啊。其實嗰次好辛苦㗎,因為我係白紙一張,又咩都唔識,四點鐘起身,三度嘅溫度,但喺著啲薄切切嘅夏天衫,仲要落水拍,咁跟住學點樣去拍mv 啊、做戲啊、minding啊……好多嘢。但係其實每一日一到夜晚我就好開心㗎啦。因為嗰餐晚餐呢,一定係最豐富嘅,一定係最好食嘅。食完之後,我就知道其實我自己只要食到一餐好好食嘅飯,當日嘅一啲唔開心,或者辛苦就會全部都無曬;所以食嘢對我嚟講係好緊要嘅。而每一次去日本旅行,可能因為口味嘅關係,我鍾意食壽司、刺身、海鮮……日本嘅嘢食,係每一次都咁鍾意,或者每一次食完都係好開心嘅。即係去過其他哋方旅行,都開心嘅,但係可能因為食嘢係主要原因啦,對我嚟講,所以每一次無論去日本邊一個地方,我都係好開心。

【值得留住最愛的一個人】
我都諗一咗陣,不死最愛應唔應該講呢個人呢,但係我覺得都應該講下嘅,橫掂大家都知道啦。咁除咗偉大嘅母親、父親、我啊哥 — 屋企人之外呢,呢個人就零七年開始就一路陪著我啦,咁中間都有啲離離合合嘅,咁然之後都有啲嗌交嘅,但係其實為數都唔多,咁嗌完大家又無事,咁佢同我價值觀又好似,咁又係唔鍾意講嘢,唔鍾意多人,咁又好悶得,又唔鍾意出街,淨係鍾意食嘢啊,淨係鍾意去旅行啊。咁佢就喺我大病嘅時間就其實一路都陪住我啦,亦都一路承受住好多我啲粉絲嘅攻擊啦,咁但係佢一路都不離不棄啦,都係一個好值得留住嘅人。總之就咁啦,再講就有排講啦。

【陳奕迅《新生活》】
最鍾意嘅唱片係陳奕迅嘅《新生活》,係一隻新曲加精選嚟㗎,都有一段日子㗎啦。咁因為新曲加精選啦,所以佢有好多大家都好耳熟能詳好好聽嘅歌啦,即喺譬如係《新生活》啦,《我什麼都沒有》啦,《與我常在》、《天下無雙》、《今天等我來》、《傷信》等等。咁除咗因為好好聽嘅歌喺曬入面之外,其實另外一個原因係因為佢錄咗好多唔同嘅獨白落去。即係喺每一首歌,或者喺某一啲歌前面,就講一啲嘢啊,或者係講個故仔啊,令到你更加投入件事先至開始聽隻歌,甚至乎我覺得係你聽完個故仔後,你可能已經知道隻歌想講乜嘢。因為大家聽歌 — 其實我都會嘅 — 一隻碟入面,可能未必隻隻歌都聽,或者隻隻歌都聽曬,咁就可能飛嚟聽,甚至乎淨喺聽一啲主打歌添。咁如果可以有一啲獨白去令到你投入咗隻歌先聽,其實成隻碟就好似係一隻故仔令到你一路一路一路咁聽落去。

【這個殺手不太冷(導演版)】
其實鍾意嘅戲就有好多嘅,我諗大家都喺嘅。但喺呢一陣子,就睇翻一啲舊嘅戲呢,我諗大家都知㗎啦,叫做《這個殺手不太冷》,不過呢,就喺一個導演版嚟嘅,即喺有一啲未出街嘅片段就擺埋落去。咁其實加咗落去嘅個段戲,其實係講緊男女主角,喺屋企到傾偈啦,講番點解會做殺手啊,點解會唔夠膽拍拖,或者點解會唔夠膽瞓喺張床到瞓教啊。咁我梗係唔講咁多啦喺度,咁如果講咗,大家就唔會去睇啦。咁而呢個版本,我覺得係有少少好文學嘅一個講法,就係我覺得令到套戲更加完整。因為一路以嚟都無講過佢之前嘅一啲戀愛經歷,或者之前佢曾經經歷過啲乜嘢,咁所以,其實睇完之後好似解開咗之前嘅一啲唔完整,即係睇咗本身個版本之後會覺得有啲唔完整,咁宜家睇完之後就覺得:啊,成件事就喺番到啦。

【不死最愛之補品 ─ 清音丸】
清音丸呢一個藥品、補品啊,其實好耐之前已經知道㗎啦。咁佢嘅用處呢,就係可能有少少潤喉啊,開聲啊嘅作用。咁通常都喺唱歌之前,我諗大約兩個鐘頭我就會食啦。因為好多時我哋好難控制到瞓教時間㗎嘛,或者好難控制到身體狀況㗎嘛——除咗唔洗做嘢嘅時候 — 咁要做嘢嘅時候,咁逼於無奈呢,可能食少少補品啊,或者食少少呢啲幫助自己唱歌好啲嘅嘢。我當佢喺一個開聲藥咁食,咁所以我平時一定會袋住。

清熱解毒,生津潤燥,用於肺熱引起的咽喉不利、口舌乾燥、聲啞失真等症。各大藥房有售。

{{::post['post_title'] ? post['post_title'] : post['profile_name']}}
{{post['profile']['profile_name']}}
{{post['single_post']['post_title']}}