方俊傑
傳媒從業員
利物浦球迷。睇戲、煲劇,百看不厭,以字為生。
詳細資料
{{::post['post_title'] ? post['post_title'] : post['profile_name']}}
{{post['profile']['profile_name']}}
{{post['single_post']['post_title']}}
方俊傑
【《刑事偵輯檔案》的曼德拉效應】

真有曼德拉效應。一直以為,廿幾年前的電視劇《刑事偵輯檔案》大受歡迎,係因為案情夠峰迴路轉,靠陶大宇與梁榮忠抽絲剝繭才成功破案,讓觀眾有欣賞《金田一》般的快感。近日翻看重播,才發現理由根本不存在,很多個案,觀眾根本一早知道誰是兇手;就算唔知,好多時都靠兇手自爆犯罪過程;就係真係要查案,好多時都係由郭可盈飾演的記者負責推理,做警察的陶大宇與梁榮忠在某程度上相當佛系,不斷犯錯,不斷被誤導,緣份到了,又自然捉到兇手。不要說金田一,就算是包青天也及不上。

當年紅透半邊天的原因,應該是因為陶大宇跟郭可盈的熒幕情侶形象夠討好?都係一場誤會。唔係話外型不相襯,係個關係的演變確實乞人憎。郭可盈本身係個勁任性的港女,有個法醫官未婚夫,但更加似當對方係兵。然後,未婚夫被踢爆偷食,郭可盈立即斬纜,轉個頭就被鬥氣寃家陶大宇成功追求。是相當電視劇的公式設定,完全無問題。去到第二輯,陶大宇有個新同事係郭藹明,郭藹明擺明暗戀陶大宇(真係擺明暗戀,我無寫錯),但陶大宇痴心情長劍,直到郭藹明有一次為陶大宇擋子彈而受傷幾乎跛,陶大宇為照顧救命恩人也為贖罪或沖淡內疚感,搞到連去婚姻註冊署同郭可盈註冊都遲到,於是嬲到女方提出分手。

之後便出事。分手後,陶大宇轉頭跟郭藹明拍拖,被郭藹明阿哥屈一屈,明知自己未忘舊愛,依然答應跟新歡訂婚;另一方面,郭可盈又搭上老闆蔣志光,仲要火速帶新男朋友見家長,仲答應一齊上上海定居。本來都無問題,大家成年人你情我願,好笑就好笑在剛剛播出的高潮位,陶大宇飲醉酒在郭可盈住所樓下呆等一晚,令郭可盈決定臨門變卦,飛起蔣志光,要求陶大宇跟自己重拾舊歡,陶大宇又終於頂唔住,死抱郭可盈不放,而明明一兩日之前,還跟郭藹明誓神劈願話自己唔會變心唔會主動跟舊愛聯絡云云。看到這裡,就算陶大宇跟郭可盈真係相愛到不能,也不能否認兩個角色其實係極度自私、幼稚、不尊重他人及拖泥帶水。簡單一句,就是討厭。你試將自己代入成郭藹明或蔣志光身上,便明白。

偏偏,我見網上社交平台個個也只批評郭藹明做第三者好討厭。真慘,郭藹明係擺明暗戀,現代人一向鼓勵主動積極爭取,唔好乜都未試過等自己後悔。何況,郭藹明係等到陶大宇同郭可盈分手後先成功突圍,無偷無騙,又真係問過好多次男朋友係咪認真,先敢相信對方真係認真,試問又點會估到男朋友連訂婚都肯,原來都唔係鍾意自己?家陣擺明是郭可盈橫刀奪愛,反而人見人愛,如果你話靚女就大晒,郭可盈係靚,郭藹明都唔醜吖,累積感情分這回事,無法解釋。我們的道德觀有時高過天花板,有時又低到用馬桶一沖水就散開。

都唔係唯一例子。同劇,蘇玉華扮演梁榮忠的太太,爭執後,未經商量未得到同意,帶埋兒子跟前夫飛往加拿大探親及渡假。如果你是梁榮忠,會怎樣?大概會覺得個太太完全不尊重婚姻,就算對方話自己冰清玉潔,都好難百分百相信吧。劇集中,剛剛相反,蘇玉華覺得自己跟另一個男人離家出走是天經地義,反而怪罪丈夫懷疑自己才是不可原諒。天呀,我究竟看了什麼?二十年前的愛情觀原來前衛過現在一百倍?是我們倒退了?我開始懷疑劇集在當年受歡迎的原因,不在案情,不在愛情,其實在創新,改革了凡夫俗子對好或壞的固有觀念。這齣劇集,可能一直被低估了。