九〇三井
生活如無要事,請打九〇三井。
詳細資料
{{::post['post_title'] ? post['post_title'] : post['profile_name']}}
{{post['profile']['profile_name']}}
{{post['single_post']['post_title']}}
九〇三井
【北韓拍過《哥斯拉》!喺香港綁架導演?超奇情細談】

呢套《平壤怪獸》由金正日大元帥親自督師監製,故事背景設於十四世紀的朝鮮,講述村莊傳說有一隻怪獸叫「不可殺」(Pulgasari),當時朝鮮有暴君當政(唔好對號入座住好冇),暴君下達酷令要收繳天下鐵器來鍛造兵器(真係唔係講大躍進好冇),有一鐵匠因為違令就被收監打死,臨死就造了一隻小土偶,並詛咒暴君。

後來鐵匠之女將土偶帶回家,不慎割傷手指滴血在上面,土偶就變身食鐵的怪獸。之後怪獸愈變愈大成為「不可殺」,成為農民起義的終極武器,有怪獸襄助下,暴君馬上收皮,但怪獸繼續食鐵不斷,連農具都食清光,反威脅到農民生存,最後女主角決定犧牲自己,同怪獸同歸於盡……

先唔好理個故仔點解咁有映射金氏王朝之嫌,呢套係金正日approve開拍的北韓本土製作,用怪獸農民起義呢招,政治正確得來夠cult亦夠娛樂性。而扮演「不可殺」的特攝演員,更是扮演正版《哥斯拉》的特攝演員薩摩劍八郎本尊,而製作更有東寶公司合作參與,血統上其實非常正宗,話係哥斯拉表親都不為過。

套戲有趣,幕後故事先經典,故事精彩部份而家先開始!

唔講未必知,金正恩老豆金正日其實是超級電影迷,大力扶助同鞭策北韓電影產業,甚至寫過電影理論書。但佢最鍾情居然唔係政治正確的東歐片、波特金戰艦乜乜乜,而係資本主義敵國的《007》系列,可能因為自己係特務片big fans關係,佢就用咗一個極有鐵金剛特色方法解決北韓電影人材不足的問題……

就係出動特工綁架電影人材返來嘞!《平壤怪獸》導演申相玉,本身其實係南韓著名導演,為咗誠邀佢強勢加盟,金正日首先派特工去香港,先喺淺水灣綁架申相玉老婆南韓女星崔銀姬,跟住再綁埋搵老婆嘅申相玉,然後以洗頭艇送返北韓,本著「大家都係韓國人」精神威脅禮待軟硬並施迫佢開戲。

雖然係綁架,但金仔老豆對電影的熱誠真是不可小覤,申相玉夫婦被軟禁八年間幫助開拍七部電影,最後一部正是這部正氣得來又夠cult、政治正確得來又有暗串色彩的《平壤怪獸》。本片深得金正日歡心,批准兩人前往柏片影展參展,終在途中借機逃走往奧地利,再獲美國庇護。呢段事跡後來改編成電影《北韓騎劫夢工場》,詳細就自己睇啦。

返返去《平壤怪獸》,戲裡戲外的故事固然有玩味之處,劇本本身其實頗為紮實,整體製作水準雖然與日本特攝略有距離,製作水準於八十年代言,特攝水平或者日本之下,但與同期香港電影距離卻意外接近,人物描寫都落筆甚豐,用鏡、特技等都有用心之處。而將特攝怪獸置於古裝的奇想與農民起義故事結合得宜,又有魔幻寫實色彩的暗喻,不得不說這是一部隱世CULT經典,難怪呃到金大帥放行去柏林參展。

為咗電影,你可以去到幾盡?金仔老豆就出動到特工去捉導演返來開拍,仲用舉國之力開戲,呢啲就叫熱誠嘞!呢期興北韓,祖國又有高鐵洗頭艇,電影發展局真係諗諗佢。
______________
Will@九〇三井,寫字人,想食燒汁鰻魚串,但食雞才是正經事。