九〇三井
生活如無要事,請打九〇三井。
詳細資料
{{::post['post_title'] ? post['post_title'] : post['profile_name']}}
{{post['profile']['profile_name']}}
{{post['single_post']['post_title']}}
九〇三井
【《無聲絕境》:高清年代鬼片已死,你同意嗎?(5分)】

睇鬼/驚憟片從來只有一個目的:嚇到自己,令自己行步路見到轉角,返屋企照鏡都有陰影。亦都老老實實,好耐未試過入場睇戲,可以睇到咁驚咁慄咁緊張。曾經有人憑(自己用拐杖篤壞嘅)時代廣場電梯,睇到香港衰敗;睇完《無聲絕境》,我見到嘅係鬼片嘅式微。

《無聲絕境》格局很簡單,甚至稱唔上新,如果唔係「無聲」呢條High-concept,異形片、美式鄉郊驚慄片、末日片、家爺仔乸片……《無》片就不過是上述無限複製濫拍題材的平凡一員,其實even「無聲」都唔係非常原創,《禁室殺戮》(Don’t Breathe)其實都係玩呢種緊張。

一套戲,可以令到全院靜默肅殺,呢種入戲、同步嘅驚慄,對上一次,可能已經係香港人仲買得起樓嘅時代。

我哋呢個年代已經對電影免疫,十九世紀時人們會為銀幕上衝過來的火車嚇到標屎衝出影院,二十世紀時《驅魔人》與《閃靈》心理陰影面積達半個地球之大,近少少,1982年的《鬼驅人》係小弟我嘅童年夢魘(知道原來血池人骨係真實骸骨後真係寒多兩分),最後一套可以嚇到眼光光訓唔著,已經係《午夜凶靈》。

AV同鬼片係兩種截然相反嘅作品,AV愈高清,用家愈有Feel愈入戲;鬼片愈高清,觀眾就冇feel兼出戲。冇錯,異形片唔係鬼片,《異形》係因應太空年代,與時並進創造的「太空鬼片」,話俾你聽上太空就冇鬼?少年你太年輕。

去到高清年代,異形已經唔係嚇人係情懷甚至係可愛,《貞子大戰伽耶子》電影公司索性把心一橫當笑片Sell;《小丑回魂》直頭變成馬德鐘級惡搞萬能key(殺人小丑呢個時代回魂,我諗連少少恐懼都食唔到,即場餓死橫屍街頭都有)。

《無聲絕境》之成功,就係因為佢終於明白,今時今日要嚇到人,隻嘢出場要有咁少得咁少,動作要有咁快得咁快,事關4k銀幕太高清,異形塊面有粒黑頭都會有觀眾睇到。如果因為銀幕高清,特技師就同佢鬥高清,到頭來,一隻太高清嘅異形/鬼/怪獸etc,就會落得《小丑回魂》的尷尬。睇AV由VCD到480p,由720到1080再4K6K8K……「試過返唔到轉頭」,高清狂潮之後,開啟聖人模式,就發覺再無異獸鬼魅能夠嚇到自己,寂寞嗎?

大膽講句,新時代新秩序,再冇一套純粹視覺足以驚慄,由《咒怨》到溫子仁,邊個唔係靠聲嚇人?去到《午夜靈異錄像》,連Baby cam偽紀錄片都玩埋,觀眾都要嫌三嫌四,威啦,開心啦,終於連聲都嚇唔到人,要玩到大家鬥沉默,鬥安靜,先至返返到去一個入戲院會入戲,一齊驚一齊震一齊瀨屎瀨尿的美好年代。

XXXXXXXXXXXXXXXXXXXXXXXXXXXXXXXXXXXXXXXXXXX

Will@903井,業餘文字人,專業拖稿,有《Stranger Things》就失蹤,近來睇完《F for Family》人生空虛,華園十三么水餃期待中。