九〇三井
生活如無要事,請打九〇三井。
詳細資料
{{::post['post_title'] ? post['post_title'] : post['profile_name']}}
{{post['profile']['profile_name']}}
{{post['single_post']['post_title']}}
九〇三井
【準時拜山,Remember me,《玩轉極樂園》.每週一評】

以前老子什麼鬼也不信,直到最近,我終於相信有地獄同天堂:睇完《與神同行》之後,我明白拍地獄真係可以拍得好地獄;睇埋《玩轉極樂園》,天堂真係可以好極樂。

撇除未開波率先反高潮嘅《Frozen》短片,《玩轉極樂園》真係冇咩好鬧,評論套戲本身,好好睇,三隻字就講完。

老子以前什麼鬼也不信,但我今日相信冥冥中有巧合,睇完《與神同行》體驗完七重悶獄睇完,同一時間《玩轉極樂園》好衰豬好完美示範一個講「來生」嘅題材係要點拍。兩套戲檔期相撞真是一個巧合?兩者之間真的沒有一些玄機?

《玩轉極樂園》用死後世界Sell 溫情,就真係做到係用奇幻設定去承托感動之處,喺呢個拜山都可以VR嘅年代,用前現代嘅各種儀式好唯美咁貫穿「只要活在記憶中,佢就唔係真正死亡」嘅信念。

不過基於公平使用原則,追打完《與神同行》(並鞭屍)同時,都要好似介紹返新界東候選人咁,點都打返五十大板證明我唔係針對韓片嘅。

PIXAR出品,唔通我話佢故事唔好咩,雖然睇過《沖天救兵》,睇睇吓都會估到個曲臣唔係好對路,睇得多PIXAR都預到幾時扭橋幾時感動位。查實套戲價值觀都算好保守,十足阿婆燒住衣紙盂蘭節叫你唔好出夜街,第日準時拜山斬多隻乳豬,如果拍做香港版,真係remember起成個羅蘭姐。

喺當撈侵年代,PIXAR拍一套墨西哥背景電影,政治動機好似中國外交部發言人華春螢話齋「不言而喻,別有用心」,開宗明義講尋找音樂理想好似左膠過左膠。出乎意料係咁保守咁講原生家庭,大家要互相原諒大家,一個尊老敬祖嘅溫馨情景,唔使動輒窮到冇褲著要殺阿媽,家庭就係家庭,樸素簡單但真係溫馨。確實,下下去到迪士尼《花木蘭》擸把青都要講句女權,喺一個F1都冇賽車女郎嘅左膠年代,呢種純樸,真係點彈得落。

不過當你一套戲拍得咁精彩,人物刻劃卡通但都真實過佢真人,故事煽情得來又真係咁有共鳴,畫面華麗又唔係賣《王者榮耀Online》封測咁——唔通我仲去捉點解靈獸戰力咁唔平均,隻藍飛虎好揪到課金課咗成球嘢咁,話去到死後世界社會都係咁唔公平,貧富懸殊仲《一念無明》過《一念無明》,話呢套戲其實好站在文化高地後殖民偽善獵奇去睇墨西哥文化生咩!

根據非正式統計,來生題材係其中一個最多人拍,亦係最易拍爛嘅題材,哲學家雅斯培話齋,因為死係唯一無可避免嘅哲學問題,而人與人交往連結,就係一個人存在唯一嘅依據,所以儀式好重要,呢種精神,《玩轉極樂園》好精彩咁演繹咗。

呢套戲,確實可以引伸好多感懷生世哲學乜乜乜出嚟,如果嗰場我唔係揀咗粵語傍晚場,前後左右為數六七個未滿九歲細路係咁問咩嚟,仲有人喊住被驅逐出會議廳,都冇咩。

不過老老實實,個故事底籠講誤闖異國死亡世界,明白到珍惜眼前人嘅道理,《陰陽路4與鬼同行》都可以話幾分似嘅。但拍得好就係拍得好。

當然有一個理由,《與神同行》我俾咗90蚊,《玩轉極樂園》我屯門睇60蚊。性價比,WIN。

睇完一套好戲,真係可以對人生好有幫助,改變咗我倫理生命觀好多,例如我會叫班子孫準時拜山,仲有養返隻望落好揪啲嘅貓主子,點解?我睇完《玩轉極樂園》心諗,養兒防老,不如養貓儲定隻靈獸level。

____________________________________________________________________________

Will @ 903井

從事文字勞動,只要有《Stranger Things》我就會失蹤。最近沉迷《皇冠》與四喜烤麩